1Th 4 | BDD | STEP | Ciyamayao, nuwatuhu wete 'aigeda 'ida Bada Yesu weyahina 'ahenuwa lagugomi, ma 'aguguyegomi, beno mwalo mumugaedi 'ahe'itegomiya ta wasanapuya 'abehega bwebwe'adi, ta weyahidi Yehoba 'iyaliyaya, ma bewa tuta 'oidiya wamumuga, sowasowana wapaipaihowa hilahiladi.

1 Thessalonians 4

Yehoba nuwanuwana mumuga 'ausalana

1 Ciyamayao, nuwatuhu wete 'aigeda 'ida Bada Yesu weyahina 'ahenuwa lagugomi, ma 'aguguyegomi, beno mwalo mumugaedi 'ahe'itegomiya ta wasanapuya 'abehega bwebwe'adi, ta weyahidi Yehoba 'iyaliyaya, ma bewa tuta 'oidiya wamumuga, sowasowana wapaipaihowa hilahiladi. 2 Ma wete Bada Yesu 'ina loinaedi 'a'ebwaegomiya wasanapudiya. 3 Yehoba nuwanuwana 'imi miya 'ausaladi, ma sahena wapuipui, 4 ma 'ane 'aigeda 'aigeda wahai mumuga 'ausalana ma dumwalunega, 5 ma sahena nuwadahwana, gide ganamuli* taudi Yehoba 'ana tohenainaidao.

6 Coinega wete sahena tomota hagadi mwanediyao wayagayagahidi, nata gide Bada 'ina gamwasowala waloba. Ginaulaedi bewa weyahidi mwalo 'ahenuwa lagugomiya. 7 Weyahina Yehoba 'ihesinuwegita geya mumuga galana weyahina, ma hesi mumuga 'ehauna weyahina. 8 Ma hesi 'eguma taiya loinaina 'iligehi, geya 'abehega tomota 'idi loina, ma hesi Yehoba 'ina loina 'iligeligehi, weyahina Yaluyaluwa Tabuna tauna nuwatuhu 'ana to'abihe'ehau, beno Yehoba 'ina 'ehele 'oida.

9 Ma 'iyadao 'adi helau weyahina nata geya 'alelediwa, weyahina Yehoba bo'i tauna 'ihe'itegomiya 'oinega waboi wahelau hilegomi. 10 Gide wete tomota mabwaiyadi tupwa Masidoniya 'alona wahelauwediya. Coinega 'alohatoto 'oimiya ma 'imi helauwedi 'oidiya 'isinabwa, 11 ma wete watoho ma wamiya daumwala, ma waboi 'imi paihowa wapaihowadi, ta sahena lowahi'wata, gide mwalo 'ahenuwa laguwegomiya. 12 Bewa 'oinega taudi geya Keliso 'ana tohemisao sihe'asisiyegomi, ma hesi 'omi 'ami lema weyahina sahena tomota hagadi 'oidiya wahehemisa.

Bada 'ina hilama

13 Ciyamayao sahena wahehenainaida to'amasao weyahidi, ma 'oinega 'eguma 'eta tasidai 'i'amasa, sahena wanuwanuwagala, gide taudi geya 'idi hemisamo toholohila weyahina. 14 Ma tauda Yesu tahemiseya tauna 'amasega 'itoholohila ma gide wete tahemiseya 'iyadaowedi bo'i si'amasa ma Yehoba tauna nata 'ihiledima, Yesu ba'idanao.

15 Bewa 'ida Bada 'ina gwaeyao 'ahehepwailediwa 'oimiya, 'abehega tutaina 'ihilama taudi 'ama'amasidi nata Keliso siloba nugeta, ma tauda mayawasida muliyetega. 16 Weyahina Badaina ma'enana madouna 'abwa 'ilatuma, ma aneloseyao 'adi tohanugeta wete 'ibwau, ma wete yoguli simu'a madouna, ma 'oinega Badaina galewega 'isuluma, ma to'amasaowedi mwalo Keliso 'ana tohemisao sitoholo nugeta, 17 ta tauda wete mayawasida taudi ba'idadao tahane galewa, ta 'ida Badaina ba'idada tamiya hataya. 18 Coinega tetela bewa 'oinega wa'abihe yaliyayegomi.